لاک ڈاؤن میں ذہنی دباؤ سے کیسے بچا جائے؟

عالمی وبا کورونا وائرس کے پیش نظر اس وقت پوری دنیا میں لاک ڈاؤن کی صوتحال جاری ہے ، ایسے میں خود کو ذہنی دباؤ اور پریشانی سے بچانے کے لیے اپنا وقت صحت مندانہ سرگرمیوں میں گزاریں ۔

ماہرین کے مطابق ہماری جسمانی صحت کا تعلق براہ راست ہماری ذہنی حالت سے جڑا ہوتا ہے ، اگر ہم پریشان ہیں اور کسی بھی قسم کے ذہنی دباؤ کا شکار ہیں تو ہم جسمانی طور پر بھی بیمار ہونے لگتے ہیں ، اور جب کوئی خاص مصروفیت نہ ہو تو انسان زیادہ سوچنے لگتا ہے جس کے نتیجے میں پریشان رہنے لگتا ہے ، ایسی صورتحال سے بچنے کے لیے خود کو اپنی اصلاح اور گھر کی اصلاح کے لیے مصروف کر لیں ۔

فراغت سے بچنے کے لیے مندرجہ ذیل کام کریں ۔

اپنے گھر میں پودے لگائیں

فارغ وقت میں گھر میں پودے لگائیں ، اگر پودے ہیں تو ان میں اضافہ کریں ، کچن مں استعمال ہونے والے مسالوں کے بیجوں سے باغبانی کریں ، گھر کے کچن سے آپ کو بہت سے ایسے بیج مل جائیں گے جنہیں اگانے کے بعد جب ان کا پھل کھائیں گے تو آپ اچھا محسوس کریں گے ، گملوں کی جگہ بدلیں ایسے کرنے سے آپکو خوشی محسوس ہوگی ۔

کتابیں پڑھیں

کتابوں سے دوستی ہمیشہ انسان کو فائدہ ہی پہنچاتی ہے ، جو کتابیں آپ مصروفیت کے باعث نہیں پڑھ سکے انہیں پڑھنے کا موقع مل گیا ہے ، فارغ وقت میں کتابیں پڑھتے وقت ساتھ میں گھر کے بزرگ یا بچے کو بٹھائیں ، اس طرح سے بچوں میں کتاب پڑھنے کی عادت بنے گی اور گھر کے بزرگوں کو آپ کے ساتھ وقت گزارنے کا اور اپنی زندگی کے یادگار لمحات کے بارے میں بات کرنے کا موقع مل جائے گا ۔

اسکیچنگ یا ڈرائینگ کریں

ڈرائینگ اور اسکیچنگ سے خود کے احساسات کو بہتر جان سکتے ہیں ، ڈرائینگ ایک بہترین عمل ہے اپنے احساسات کو کاغذ پر اتارنے کا ، کاغذ، پینسل چند رنگ یا کلرنگ کٹ لے کر خاندان کے ساتھ یا اکیلے بیٹھ جائیں اور ڈرائنگ کریں ، جو اچھی بن جائے اسے آپ اپنے گھر کی دیوار پر بھی لگا سکتے ہیں ۔

کچھ لکھیں

لکھنا ایک بہت صحت مندانہ عمل ہے، ذہنی دباؤ اور اعصابی تناؤ کا علاج بھی۔ لکھنے کی عادت بنائیں، جو یادیں یا لمحات آپ کے ذہنوں میں خوشی یا غمی کا احساس ابھارتے ہیں ان کو تحریر کی کل دے دیں ، آپ خود کو پہلے سے سلجھا ہوا اور خوش محسوس کریں گے۔

نت نئے کھانے پکائیں

اپنے اندر چھپی صلاحیتوں کو باہر لانے کا یہ بہترین وقت ہے، کچن میں جائیں نت نئے کھانے بنائیں ، جو کھانے کبھی نہیں آزمائے وہ آزمائیں، کوکنگ کرنے سے انسانی ذہن بہتر انداز میں ذہنی دباؤ اور دماغی خلفشار سے باہر آ جاتا ہے ، کھانا پکاتے ہوئے گھر میں موجود بچوں یا بڑوں کو بھی ساتھ ملا لیں تا کہ ان کا بھی اچھا وقت گزرے۔

Source